Mediese Nooddienste Reageer Vroegoggend op Noodroep

Blou Maandag vir nooddienspersoneel en motoriste. 

Luidens 'n persverklaring wat Maandagoggend uitgereik is deur die woordvoerder van die Wes-Kaapse Mediese Nooddienste, het die Nooddiens om 06h26 op Maandagoggend, 8 November 'n oproep om hulp ontvang wat verband gehou het met 'n motorvoertuigongeluk wat op die R316 tussen Bredasdorp en Napier, etlike kilometers van Napier af, plaasgevind het. 'n Trok en 'n ligte motorvoertuig was in die ongeluk betrokke. Die drie volwasse mans wat in die trok was, het geen beserings opgedoen nie. Die enigste insittende van die ligte motorvoertuig is egter noodlottig beseer en was in die voertuig vasgekeer. Die oorledene was die 27-jarige Matthys Jacobs van Bredasdorp.

Pad vir ure vir verkeer gesluit 

Terwyl daar gewag is op 'n hyskraan-trok waarmee die noodlottig beseerde bestuurder van die ligte motorvoertuig onder die trok uitgehaal kon word, was die pad vir alle verkeer gesluit. Die trok het dwars oor die pad tot stillstand gekom na die ongeluk terwyl stukkende bottels en 'n groot hoeveelheid kiste waarin drank vervoer is, oor die hele padoppervlak gestrooi gelệ het. 

Druk verkeer op agterpaaie

Afgesien van verkeersbeamptes en nooddienspersoneel, was beamptes van die Napier polisistasie deurgaans op die toneel. Padblokkades is opgerig by die ingang tot Napier waar motoriste wat onderweg was na Bredasdorp en ander bestemmings, versoek is om met 'n ompad wat verby die Napier silos loop, daarheen te ry. Verkeer vanaf Bredasdorp is wat nie by die Strormsrivier afrit afgedraai het nie, is voorgekeer by die Holdrif afdraai. Die pad is na 14h00 eers weer vir verkeer wat tussen Bredasdorp en Napier beweeg oopgestel.

Ora Laubscher