Red ’n Seeskilpad Só

Lede van die Twee Oseane Akwarium het Struisbaai verlede Vrydag besoek en ’n kleurvolle inligtingsbord op die hoofstrand opgesit wat die publiek inlig oor hoe om te werk te gaan as hulle ’n uitgespoelde seeskilpad vind.

Die inisiatief is met die ondersteuning van die Nasionale Seereddingsinstituut (NSRI) deur die Tw ee Oseane Ak w ariu m in Kaapstad se opvoedkundige been en Cape Nature van stapel gestuur. Inligtingsessies is op kusdorpe vanaf Mosselbaai tot Witsand gehou, waartydens die NSRI inligting voorsien het rakende die hantering van seeskilpaaie wat op strande gevind word.

Die laaste besoekpunt was die N S R I se Agulhas-stasie op Struisbaai wat deel is van die Overberg Seeskilpadnetwerk. Klein seeskilpadjies wat op die strande in die omgewing uitspoel, word gereeld deur inwoners van Struisbaai en Agulhas opgetel en na die NSRI sentrum gebring. Van hier af word hulle dan na die Twee Oseane Akwarium geneem waar hulle versorg word totdat hulle sterk genoeg is om vrygelaat te word.

Helene Engelbrecht wat tydens ’n staptog by die Stinkbaai-rotspoel op Agulhas op ’n beseerde groen skilpad afgekom het, het Vrydag die kans gehad om lede van die Twee Oseane-span te ontmoet.

‘Helene se skilpad’, wat Hulk gedoop is, het die verbeelding aangegryp omdat sy ondanks kwaai beserings aan haar kop en buik goed aangesterk het. Sy is aan die begin van Maart naby Houtbaai in die see vrygelaat.

Inwoners en besoekers aan die streek se strande sal nou met behulp van die borde presies weet wat om te doen as hulle gestrande of beseerde seeskilpaaie teëkom. Die seisoen waartydens die klein skilpadjies na verwagting kan begin uitspoel, is om die draai. Groter skilpaaie spoel net uit wanneer hulle om een of ander rede – dikwels ná stormweer – die pad byster raak en beseer word of verstrengel raak in vislyn of plastiek.

Die noodnommer van die Skilpadnetwerk by die NSRI stasie op Struisbaai is 083 300 1663

Ora Laubscher