Gemeente as proeftuin
Matteus in sy evangelie gebruik die woord “ekklesia” om die kerk te beskryf. Dit beteken vergadering, gemeente, volk of groep. Hy herskep in die sin die woord. Dit word nou die woord om die nuwe volk van God te beskryf wat nie meer net uit Jode bestaan nie, maar almal wat in Christus glo. Die teoloog Berkhog help ons verder om die rol van hierdie gemeenskap of kerk in die wêreld te verstaan. Die kerk is gerig na die wêreld “als ‘eersteling’ van Gods bedoeling, als proeftuin van een nieuwe humaniteit.”
Hy bedoel dat dit wat God bedoel het vir die mensdom moet in die kerk sigbaar wees. Die kerk is God se proeftuin. Hier word gelowiges gelei deur die Woorde en Gees om in hulle identiteit as God se besitting in te groei. Die Gees laat ons vrug dra en verander ons. Soms word ons moedeloos want dit wat kerk kan wees en geroep wees om te wees is nie wat ons altyd is nie. Tog bly ons God se gekose gemeenskap, oppad na geloofsvolwassenheid.
