Ek loop op pad huis toe ‘n ou met ‘n matroospet en sandale langs die Franskraal-karavaanpark raak. Ek wys hom ‘n pragtige molslang wat net oor die pad seil. Ons gesels toe ‘n bietjie; sy naam is Jack en hy vertel my hy was joernalis op PE; sy laaste baas blyk toe ‘n ou universiteitsmaat van my te gewees het.
Jack het na sy aftrede ‘n plasie by Botrivier vir iemand gaan oppas. Daar hoor hy toe Gregoire Boonzaaier woon nog op Onrus. Hy skryf toe ‘n lofgedig vir Gregoire, klim op sy trapfiets en gaan oorhandig dit persoonlik aan die bejaarde skilder.
Dié is toe so dankbaar vir die onverwagse eerbetoon dat hy Jack vra om vir hom ‘n paar skilderye uit te te soek van dies wat aan die muur hang en skynbaar nie verkoop kon word nie. Jack doen so en neem hulle baie dankbaar huis toe.
Die baas van sy plasie verkoop dit toe en Jack moet trek. Ten einde raad stuur hy sy paar Boonzaaiers na ‘n afslaer met die hoop om darem ietsie daarvoor te kry. Na maande kry hy ‘n tjekkie vir .... R160 000!
“Ek koop toe vir my ‘n huisie in die karavaanpark, en hier is ek!” vertel Jack. Wonderlik hoe die toeval soms werk.
