Marieta Rademeyer van Gansbaai Primêr

Marieta Rademeyer van Gansbaai Primêr het op 5 Oktober vanjaar weer eens ‘n toekenning ontvang. Sy is as een van 62 genommineerdes na ‘n spoggeleentheid deur Inclusive Education Western Cape in die Moyo Kirstenbosch restaurant in die Kaap genooi. Die “Inclusive Education Recognition Luncheon” is ter viering van Onderwysdag aangebied, met Inclusive Education Western Cape wat sertifikate van waardering aan etlike individue en skole oorhandig het. “Die uitnodiging het my geheel en al verras en ek het geen idee gehad van wat gaan gebeur nie en ek dra ook geen kennis van wie my genommineer het nie,” het ‘n verheugde Marieta gesê. Die oorhandiging van die sertifikate is deur die MEC van die Wes-Kaap, mnr Donald Grant, waargeneem, waarna die gaste ‘n 3-gang maaltyd vanuit die boonste rakke geniet het. Inclusive Education Western Cape is ‘n nie-winsgewende organisasie wat inklusiewe onderwys bevorder en ondersteun.

Marieta is ‘n onderwyser van Gansbaai Primêr, verantwoordelik vir die Eenheidsklas (Leerders met spesiale leerbehoeftes), waarvoor sy onder andere al met ‘n Presidents Toekenning vereer is.

Hardus Botha