Sedert die openingsdag op Saterdag, 7 Desember is die Kersmark vinnig besig om spoed op te tel. Ondanks die geweldige wind van Saterdag, het ‘n tou mense gereed gestaan om in te gaan, met ‘n besoeker wat gesê het: “Vergeet nou van die stormwind en maak oop die deure sodat ons kan inkom!”

Daar is weer eens ‘n groot verskeidenheid van geskenke en Kersgeskenke wat aangekoop kan word, asook die gebruiklike restaurant op die verhoog waar die innerlike versterk kan word. Die tema van vanjaar se pragtige en kunstige versiering van die voorportaal en verhoog is “ruimtelik” - pragtig en die moeite werd om te sien! Die Kersmark se bedryfsure is steeds elke weeksdag en Saterdae vanaf 09:00 tot 18:00. Sondae is dit gesluit. Bykomend is dat daar nog twee aandmarkte sal wees: Vrydag, 13 Desember en Vrydag, 20 Desember. Op hierdie twee dae sluit die Kersmark dus nie om 18:00 nie, maar eers om 21:00 wat dit gerieflik maak vir werkende mense. Die laaste geleentheid vir Kersinkopies is op Saterdag vanaf 08:00 tot 14:00, waarna vanjaar se Kersmark sal sluit.

Die organiseerders, Thys en Linda Cilliers bedank almal byvoorbaat vir die ondersteuning, asook die vrywillige werkers wat reeds lank voor die tyd baie hard gewerk het om alles in plek te kry. Vir navrae kan Linda by 082-722-8604 geskakel word en Thys by 083-654-9507.

Hardus Botha