Die Uilkraal-vakansiehuis van André Wessels wat tydens ‘n brand verwoes is en daarna die volgende oggend oorstroom is ná hewige reën. (Foto: Tia Nagel van Ceres)

Die Uilenkraalsmond vakansiehuis, Plot 450, van André Wessels van Caledon is op Dinsdag, 7 Januarie geheel en al in ‘n brand vernietig en die volgende dag oorstroom.
Vakansiegangers in die huis direk oorkant die afgebrande huis, Innis en Tia Nagel van Ceres, het omstreeks 10:30 op die stoep gesit en gesien hoe die gordyne in die huis begin brand. “Daarna was die huis in vlamme gehul,” het Innis gesê. “Ons het dadelik die brandweer ontbied, maar dit was duidelik dat groot skade aangerig gaan word.”
Gansbaai Brandweer, die SADP, verkeersbeamptes en Overstrand Medical Response was vinnig op die toneel, maar die vlamme het vinnig versprei en die huis kon nie gered word nie.
André sê hy het aanvanklik ‘n karavaan in Uilenkraalsmond Vakansie-oord besit, maar later die huis gekoop. Die huis was ten volle gemeubileer, maar alles is deur die brand vernietig. Die oorsaak van die brand was met die ter perse gaan van hierdie berig nog nie bekend nie.
‘n Enkele dag ná die brand op Woensdag, 8 Januarie het Uilenkraalsmond Vakansie-oord weer onder stormwater deurgeloop met huise wat oorspoel is. André se afgebrande huis was, ironies genoeg, een van die huise wat oorstroom is deur reënwater.
Hardus Botha

Die afgebrande Uilkraalhuis van André Wessels wat direk die volgende dag onder stormwater deurgeloop het  (Foto: Gerrie Moelich)