Gansbaai Superspar se eienaars, Morkel (links) en De Wet van Niekerk, wat ‘n goeie voorbeeld tydens ‘n vorige Kansa Shavathon gestel het. (Argieffoto: Gansbaai Courant)

“Gaan Kaalkop en Kleurvol om Kansa te help,” lui Maryke Malone, Kansa se Gemeenskapsmobiliseerder en Fondsontwikkeling se boodskap aan Gansbaaiers.

Die Kankervereniging van Suid-Afrika (Kansa) vier vanjaar 83 jaar van diens en is steeds volstoom aan die gang. Alles is gerat vir die 11de jaarlikse Shavathon, wat op 1 Maart in meer as 200 winkelsentra landwyd gaan plaasvind. Om jou hare te verloor is ‘n algemene newe-effek van kankerterapie, daarom is die skeer van hare ‘n simboliese gebaar van ondersteuning aan kankeroorwinnaars. Om jou hare te kleurspuit is ‘n alternatiewe opsie. Jy kan so enige iemand wat ooit deur kanker geraak is, ondersteun. Die koste beloop R50 vir volwassenes en R25 vir kinders onder 12 jaar. Die Shavathon word eerskomende Saterdag by Gansbaai Superspar vanaf 9:00 - 14:00 aangebied.

“Ons sien uit na die Gansbaai-gemeenskap se ruimhartige deelname, in kleur en styl,” sê Maryke. Sy kan by 028-316-3678 gekontak word, of besoek die webtuiste http://www.shavathon.org.za/faq/.

Hardus Botha