'n Mensejag om 'n berugte gewoonte-inbreker vas te trek, is Woensdagmiddag in Blompark ontketen.
Rodney Adendorf (regs), wat in Desember op parool vrygelaat is, het na bewering weer vanaf Januarie tot 'n vlaag van inbrake oorgegaan.
Volgens Speur Sers Leon Crafford word Adendorf reeds met 10 huisbrake in die Kleinbaai en Blompark woonbuurte verbind.
Die Departement van Korrektiewe Dienste het ook 'n lasbrief vir sy inhegtenisname uitgereik omdat hy nie sy paroolvoorwaardes nagekom het nie.
Die polisie het verlede Woensdagoggend inligting van die publiek ontvang dat Adendorf in Blompark opgemerk is. 'n Groot aantal polisiebeamptes is dadelik in die gebied ontplooi waarna hulle hom deur die woonbuurt oor heinings en erwe gejaag het. 
"Inwoners se hulp was van groot waarde want hulle het deurgaans sy vlugroete aan die polisie uitgewys," het Spr Kapt Danie Rautenbach gesê. Adendorf is om 13:00 aangekeer en gearresteer. Daar is gesteelde eiendom in sy besit gevind wat verbind is met inbrake in Kleinbaai en Blompark.
Hy is ook aangekla vir besit van 'n gevaarlike wapen ('n lang mes), dagga en huisbraak implemente.
Die verdagte het verlede Vrydag in die Landdroshof in Hermanus verskyn en bly in aanhouding.
Die saak word verder ondersoek.
Francois de Jongh