“Jy moet nie te veel aanlas nie, ek is ‘n ervare skipper en kan nie glo dit het met my gebeur nie - ek wil nie eers my gesig in die dorp wys nie!” vertel De Wet Giliomee terwyl hy oor sy omgeslane boot praat. “Ek wil sommer dadelik dankie sê aan Pieter Kalbas, Nico Kotze en Koos de Kock vir die bystand en ondersteuning wat ek van hulle ontvang het.” De Wet en sy 2 bemanningslede het verlede Sondag, 22 Februarie 2015 by Joubert se Dam met sy boot, Liro, gaan hengel. Die vis het goed gebyt en hy praat van ‘n mooi klompie snoek en makriel wat almal “haai-kos” geword het nadat die boot omgeslaan het. “Die skroef, wat vermoedelik nie stewig genoeg vasgesit is nie, het uitgehak en die boot het water gevat en omgedop,” vertel De Wet. Hy is deur Pieter Kalbas tot by Black Sophie gesleep, waar Nico Kotze met Koos de Kock se kragtiger boot oorgeneem het en hulle na Kleinbaai Hawe gesleep het. “Daar was reeds 6 bemanningslede op Pieter se boot en hy het die 3 van Liro ook opgelaai, wat gemaak het dat sy boot te swak was om Liro na Kleinbaai hawe te sleep en Nico het met my boot oorgeneem,” vertel Koos de Kock. De Wet is ook ‘n lid van die Birkenhead Boothengelklub en hy sê daar is wel heelwat skade aan sy boot, maar dit is reeds herstel en op Dinsdag, 24 Februarie was Liro weer seevaardig.     

Hardus Botha

Zoom

Zoom