Eenmaal ‘n balletdanser, altyd ‘n balletdanser - selfs op ‘n hoë ouderdom en dalk net in die gedagtes. Lynette van Wyk, ‘n bekende in balletkringe waar sy vele hoofrolle in hoogaangeskrewe ballet-opvoerings wêreldwyd vertolk het, is onlangs verras met ‘n besoek deur een van haar oud-dansmaats, Michael Baker en ‘n vriend, Charl de Villiers, ‘n bekende chirurg, altwee van Kaapstad. Michael is in Nieu-Seeland gebore waar sy professionele balletloopbaan begin het. Later is hy na Suid-Afrika waar hy homself as ‘n professionele hoofdanser (“principal”) bewys het en in die meeste leidende klassieke repertoire saam met onder andere Margot Fonteyn, Eva Evdokimova en Merle Park gedans het. Sy besoek aan Lynette was vir haar ‘n onvergeetlike gebeurtenis en sy het sommer etlike ou spogfoto’s tevoorskyn gebring om haar optredes saam met Michael trots te vertoon. “My asem was skoon weggeslaan oor die groot hoeveelheid ballet-video’s van ons vorige optredes, asook andere, wat Michael as ‘n geskenk aan my saamgebring het,” vertel Lynette. “Ek kan nie wag om na almal te kyk en dit ook aan andere te wys nie.” ‘n Heuglike kuierdag en aangename herinneringe vir ‘n passievolle mens wat, ondanks haar ouderdom, steeds aan haar droom vashou deur as mentor vir die jonger geslag op te tree om belangstelling vir ballet en dans te laat bly voortleef.

Hardus Botha

Zoom