'n Argument tussen 'n man en sy vrou oor geld het na bewering Sondagaand om 02:00 tot die man se dood gelei.

Frankie Newman (49) het na 'n oor en weer bakleiery aan 'n meswond in die bors gesterf. Volgens ooggetuies in hul huis in Kampeerweg 9 in Blompark, is sy vrou, Rachel Newman, erg aangerand en was haar gesig geswel en bebloed.

Volgens haar het Frankie in hul slaapkamer gedreig om haar met 'n bierbottel te slaan. Sy het toe vir hom gesê dat sy hom met 'n steakmes wat op die bed gelê het sou steek. Die mes se lem het volgens haar egter uitgeval en toe hy oor die bed probeer klim, het hy misgetrap, en met sy bors op die los lem geval. Hy het glo toe op die bed bly lê en self die lem uit sy bors getrek en haar versoek om 'n lap aan te gee. Hy is egter kort daarna dood.

Sy bejaarde ma, Elizabeth Joemat, glo egter nie hierdie weergawe nie en sê: "Sy het hoeveel keer al gesê sy gaan hom vrek maak."

Rachel het Dinsdag in die hof verskyn en die staat het nie borgtog teengestaan nie. Die oorledene was welbekend as 'n Munisipale Rioolsuigvragmotorbestuurder. Hy het egter kort gelede uit sy werk bedank.

Francois de Jongh

Zoom

Zoom