Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
“Verlede Dinsdagoggend het ek nog ‘n linkerduim gehad”, vertel Johan Paulsen, eienaar van die Skip-Go minibak agentskap.
Johan en sy vrou Estelle, het in Meimaand van Pretoria na Gansbaai verhuis, nadat hulle ‘n huis in Franskraal gekoop het. Johan het die Hermanus-agentskap van die nasionale Skip-Go rommelbestuursmaatskappy gekoop. Alhoewel sy agentskap van Rooi Els tot Agulhas strek, fokus hy aanvanklik net op Gansbaai en Hermanus.
Johan het verlede Dinsdag een van sy twee-ton bakke by ‘n huis in Kleinbaai gaan oplaai, toe die fratsongeluk gebeur. Die vol bak is deur die hidroliese silinders tot bo die sleepwa gelig, toe die bak begin swaai. Instinktief het hy die bak se momentum probeer keer, voordat dit teen die enjinkas vasswaai. Wat volgende gebeur het, weet hy nie, maar die volgende oomblik sien hy sy duim teen die bak hang.
Nadat hy, tot verbasing van omstanders, nog tien minute lank op die toneel was om noodhulp op homself toe te pas en die bak te stabiliseer en te laai, is hy na ‘n plaaslike dokter se spreekkamer en daarna na ‘n hospitaal op Hermanus. Alhoewel hy sy duim saam geneem het, kon dit nie geheg word nie; die bak het ‘n deeglike amputasie van die duim se eerste lit gedoen. In die hospitaal is sy duim onder lokale verdowing toegewerk. Ten spyte van die pyn, is Johan reeds weer met sy geel-en-swart bakke in Gansbaai se woonbuurtes te sien om Gansbaai ‘n skoner plek te maak.
Bygedra: Emmie Smit
