Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Die bure van Hendrick en Natasha Bodensteyn van Franskraal Karavaanpark, wie se huis Dinsdag, 27 September 2016 tot as verbrand het, JJ (Cobus) en June Malan, vertel dat hulle bykans die hele nag buite spandeer het om verdere skade aan hul eie huis te voorkom.
Gansbaai Courant (Donderdag, 6 Oktober 2016) het berig van Hendrick en Natasha Bodensteyn se huis in Franskraal Karavaanpark wat tot as verbrand het.
Die egpaar en hul drie kinders, De Wet (11), Nathen (1½) en Henco (5 maande), wat nie tydens die brand tuis was nie, het net die klere aan hul liggame oorgehad.
Die oorsaak van die brand is nog nie vasgestel nie. Hendrick het gesê dit gaan beter onder omstandighede en dat hulle graag hul opregte dank en waardering teenoor almal wat behulpsaam was en hulle ondersteun het, wil oordra.
Twee persone wat nie oor die hoof gesien kan word nie, is JJ en June Malan. Die egpaar het die brandweer ontbied, maar intussen het hulle vir etlike ure met ‘n tuinslang in die reën probeer doen wat hulle kon.
Hulle eie huis het ook ernstige skade opgedoen, soos gebrande balke, elf gebarste ruite, swart-gebrande mure, kantgordyne en gesmelte TV-drade.
“Ek het in die reën hek toe gestap om die brandweer te laat inkom en verder was ons die hele tyd buite met die tuinslang in die reën besig,” vertel JJ. “Selfs die volgende dag moes ons nog toesien dat die smeulende as nie weer vlamvat nie.”
JJ sê hy het ook in die reën gesukkel om die groot gasbottel weg te rol om te verhoed dat dit ontplof, wat inflamasie in sy rug tot gevolg gehad het.
‘n Groot dankie is aan hulle verkuldig vir hulle omgee en besorgdheid.
