Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Die “Engelsman” wat Gansbaai jaarliks vanuit Brittanje besoek en as die dorp se Barmhartige Samaritaan bekendstaan, was verlede Sondag, 5 Februarie 2017, in ‘n motorongeluk in Hoofstraat betrokke.
Jack Doyle het vir aankomende verkeer gewag, toe hy omstreeks 10:00 by Gansbaai OK Foods wou indraai. Hoewel die flikkerlig van die huurmotor waarin Jack gery het, aangeskakel was, het ‘n blou Toyota na bewering teen ‘n hoë spoed in hom vasgery. Die bestuurder van die Toyota, Sibahle Jebese (32) is kort daarna vir die bestuur van ‘n voertuig onder die invloed van alkohol gearresteer.
By nadere ondersoek is gevind dat Sibahle slegs oor ‘n leerlinglisensie beskik. Hy is dus ook daarvoor aangekla.
Met ‘n oproep deur Gansbaai SAPD na die Staatsaanklaer in Hermanus is borgtog Maandag, 6 Februarie 2017 aan Sibahle toegestaan. Die verhoordatum sal volg. Hoewel ‘n vreemde praktyk, het Gansbaai SAPD bevestig dat borg op dié wyse toegestaan kan word.
Barmhartige Samaritaan
Jack en sy eggenote, Anita, is van Chester Le Street, Engeland en besoek Gansbaai jaarliks gedurende die eerste 3 tot 4 maande van die jaar, waartydens groot donasies aan Gansbaai Primêr, Masakhane Primary School en ander liefdadigheidsorganisasies oorhandig word.
Die fondse vir hierdie buitengewone werk wat hy in ons dorp verrig, is hoofsaaklik afkomstig van fondsinsamelingsprojekte deur die Rotarie-klubs in Engeland waar hy woon.
