Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
“Laat die potte prut” - en toe wen Owl’s Pub se span die DSTV program op VIA 147 se potjiekos-kompetisie loshande.
Die program-aanbieder het die eienaar van Owl’s Pub, Jason Blunden, onverwags een Vrydagaand geskakel en gevra of hy in die kompetisie sou belangstel. Jason het die uitdaging aanvaar en die volgende dag moes ‘n naam vir sy span, ‘n plek waar die kompetisie sou plaasvind en die spanlede se besonderhede verskaf word.
Jason se spanlede was Lezelle Jacobs (Owl’s Pub), Boemba Fourie (Visserman op Bella Prima) en Goebels Geldenhuys (Visserman op Vleigans).
“Ons het op die naam ‘Die Uitspanners’ besluit, aangesien daar gereeld by Owl’s Pub uitgespan en ontspan word,” het Lezelle gesê. Die daaropvolgende Woensdag het die span met hul potjies en bestanddele na De Uijlenes vertrek, waar die kompetisie opname sou plaasvind.
Verskeie areas in die Overberg het elk 6 spanne ingeskryf.
Die “Uitspanners” van Owl’s Pub se keuse vir die 4 potjies wat gemaak moes word, was Alikreukel (1), Perlemoen (2), Bokkombrood (3) en Gegeurde rys (4).
Lezelle sê dit was ‘n lang dag wat baie geduld geverg het, maar wat hulle ook baie geniet het, veral om te sien wat alles agter die skerms tydens filmwerk gedoen word.
“Ons het so teen 09:30 begin en alles moes twee keer gedoen word, met kameras die hele dag rondom jou wat maar aan die senuwees geknaag het,” vertel Lezelle.
“Die hele gedoente is eers teen 21:00 die aand afgehandel.”
Sy sê daarna het die ergste deel van die kompetisie gevolg:
Niemand is as wenners aangewys nie.
Die spanne moes wag vir die uitsending van die program op 30 Januarie 2017 op die DSTV-kanaal VIA 147 om te sien wie die wenners was. “Die oomblik toe ons besef die “Uitspanners” het gewen, was ons oorstelp van vreugde en al wat ek vir almal daar buite kan sê, is: As so ’n geleentheid opduik, gryp dit aan en ‘go for it’, dit is ‘n fantastiese ervaring.”
