Lize van Dyk, 'n voormalige personeellid van Gansbaai Media, het onlangs gegradueer.
Hierdie 24-jarige skrander dame het vanjaar haar BA-graad in Geesteswetenskappe verwerf. Sy het drie hoofvakke, naamlik Sielkunde, Xhosa en Engels, waarvan sy laasgenoemde twee elke jaar met lof (Cum laude) geslaag het. Lize het op 31 Desember 2009 haar laaste werksdag gewerk en voltyds aan die Universiteit van Stellenbosch gaan studeer.
Op daardie stadium het sy tydens 'n onderhoud onder andere gesê: "Dit was nog altyd 'n droom by my om sielkunde te bestudeer en noudat ‘n studiebeurs aan my toegeken is, kan my droom verwesentlik word. Ek het drie doelwitte vir myself gestel: 'n BA-graad in Geesteswetenskappe, my Honneurs en dan my Meestersgraad."
Lize se ouers is Wikkie, 'n Arbeidsmakelaar en Anita van Dyk, Administratiewe Bestuurder van Herberg-aan-See. "Lize het baie goed presteer en sy kan meer as tevrede daaroor voel," vertel Anita. Na skool was sy vir 1½ jaar in diens van Gansbaai Media.
Nou is Lize se eerste doelwit ná drie suksesvolle Universiteitsjare bereik, waarna sy nou in 2013 vir haar Honneurs gaan inskryf. Praat van deursettingsvermoeëns, dit het Lize sonder enige twyfel.
Hardus Botha