Onvoorsienbare en onvermybare uitgawes wat verband gehou het met die bestryding van brande waarvoor daar nie voorsiening op die huidige bedryfsbegroting gemaak was nie, is op versoek van die Munisipale Bestuurder, mnr Coenie Groenewald deur sowel die waarnemende Burgemeester Pieter Scholtz, as Burgemeester Nicolette Botha-Guthrie. goedgekeur.

Rhr Scholtz het die raadslede ingelig dat die brande einde Desember en middel Januarie in die omgewings van Hermanus en Pringlebaai van so ‘n ernstige aard was dat lug- en grondondersteuning van Working on Fire gebruik moes word. Die koste daarvan het tussen R600 000 en R900 000 beloop. Die munisipaliteit het intussen aansoek gedoen vir bystand vanaf die Wes-Kaapse Rampbestuursentrum. Indien dit toegestaan word, sal die bystand in die komende aanpassingsbegroting opgeneem word.  
Fanie Krige