Dit is lankal reeds "ou" nuus dat Gansbaai se Toerismekantoor aktief, bedrywig en tops in alle opsigte is. 'n Besoek aldaar dui op professionaliteit, vriendelikheid en kundigheid rakende omgewingstoerisme-aangeleenthede. Om as Vriend van die Toerisme Buro aan te sluit, beloop 'n skrale R80 per jaar, wat vele voordele insluit. Behalwe vir vars en opdatum inligting van gebeurtenisse, aanbiedinge en vele ander aktiwiteite in en om Gansbaai, spog hulle lankal reeds met 'n goedversorgde Nuusbrief. "Ek streef daarna om hierdie Nuusbrief 'n maandelikse Nuusbrief te maak ten einde nuus so vars as moontlik beskikbaar te stel," skryf Glenda Kitley, Bestuurder: Gansbaai Toerisme in die April Nuusbrief. Die Nuusbrief vertoon netjies en professioneel en is propvol nuus van alle kante af, met meer as genoeg foto's ter illustrasie, wat die Nuusbrief des te meer opkikker en interessanter maak.

Om lid te wees van Gansbaai Toerisme, beteken om deeglik op hoogte te wees van 'n wye verskeidenheid van gebeure in en om Gansbaai, asook elders. Lesers moet ook onthou van hulle Groot Jaarkalender om onnodige botsings met gebeurtenisse te verhoed. Gansbaai Toerisme Buro se besoektye is Maandae tot Vrydae 08:30 - 17:00; Saterdae 09:00 - 16:00; Sondae 10:00 - 14:00; Vakansie Dae 09:00 - 16:00.

Vir opdatum Toerisme gebeure en interessanthede, kan hulle by 028-394-1439 gekontak word, of stuur 'n e-pos aan gansbaaiinfo@telkomsa.net.
Webtuistes: www.gansbaaiinfo.co.za of  www.gansbaai.com. 

Hardus Botha