'n Leser van Gansbaai Courant het met 'n sak waarin hy braaihout gekoop het, by die kantoor aangedoen. Hy het gesê dat hy dié spesifieke sakke hout by die verkoopsarea by die ingang na die Industriële gebied gekoop het. Nadat hy die sakke oopgemaak het en die hout hanteer het, het sy vel en oë erg begin brand. Hy het besef dat dit die gifstowwe is wat oorspronklik in die sakke was, wat die allergie veroorsaak het. "Ek het net gevoel lesers moet bewus wees van die situasie, aangesien die gifstowwe dalk 'n erger uitwerking op kinders kan hê," het hy gesê. Die waarskuwingsteken op die spesifieke sakke waarin die hout verkoop word, lui soos volg: "HAFIF Soda (Soda ash light)". Waarskuwings word in verskeie tale onder spesifieke kodes aangedui: "H319 - Causes serious eye irritation; P264 - Wash thoroughly after handling; P280 - Wear protective gloves, protective clothing, eye protection, face protection; P305, P351, P338 - If in eyes: Rinse cautiously with water for several minutes; P337, P313 - If eye irritation persists: get medical advice/attention." Hierdie aanduidings op die sakke dui sonder twyfel daarop dat braaihout nie daarin verkoop behoort te word nie en lesers kan gerus kennis daarvan neem.                       
Hardus Botha