‘n  Man het Dinsdagaand om 23:00 toegang tot ‘n  huis in Rietgansstraat, Perlemoenbaai se eerste verdieping gekry en ‘n  vrou met ‘n  mes verskrik. Die vrou was saam met 'n jong seuntjie wat tans daar kuier besig om in die sitkamer televisie te kyk en het ingesluimer. Die seuntjie het haar egter wakker gemaak en gesê daar is 'n gesig en 'n hand by die venster. Sy het na buite gekyk en 'n man op die balkon sien staan. Sy het die kind gegryp en na haar hoofslaapkamer gevlug waar haar man reeds geslaap het.  Sy het weer gaan kyk wat aangaan maar die man het reeds daarin geslaag om die skuifdeur oop te maak en was klaar binne. Hy het 'n mes in sy hand gehad en goed in die kamer gegryp. Die vrou het haar toe by haar man en die kind in die slaapkamer toegesluit en die polisie ontbied. Die inbreker het met sy buit van twee skootrekenaars en 'n selfoon ontvlug. Drie Blompark mans is om 03:50 in Kerkstraat gearresteer en gereedskap is by hulle gekry. Een is positief uitgeken en al drie sal Vrydag in Hermanus Landdroshof verskyn.
Francois de Jongh