‘n Stryery het Vrydagnag tot ‘n skietery in ‘n sjebeen in Masakhane gelei.
Thobela Janase (25) het saam met vriende van beide geslagte gekuier toe Phimile alias Xhesha Nonkanzela (33) om 23:00 daar opgedaag het.
Hy het volgens ooggetuies gesê:  "Jy gaan nie hier drink nie." ‘n Woordewisseling het gevolg waarop Xhesha ‘n 9mm Beretta pistool uitgeruk en Thobela na bewering deur sy regterbors geskiet het. "Die koeël is tussendeur sy ribbes sonder om een te raak en by sy rug uit.  Hy is na Hermanus Provinsiaal geneem," het die ondersoekbeampte, A/O Fanie Killian, gesê. Inligting is die volgende oggend ontvang dat die verdagte in ‘n motor in Masakhane sit en probeer het om geld te leen, om soos hy dit gestel het, land toe te gaan.
Hy is gearresteer en het aan die polisie uitgewys waar hy die pistool versteek het. Dit is nie in sy naam geregistreer nie en volgens hom het hy dit in Khayelitsha by ‘n onbekende persoon gekoop. Die ondersoek duur voort.
Francois de Jongh