Daar is nog net 'n paar afslaantye oop vir Gansbaai Academia se gholfdag wat op 14 September gehou word. Die hoofborg van die dag is Goose Bay Paints en die doel van die Gholfdag is om fondse vir die skool te genereer.

“Sedert verlede week is verskeie nuwe donasies vir pryse ontvang, wat onder ander uiteet-bewyse by ons plaaslike restaurante insluit,” vertel Ernst Nieuwoudt, Voorsitter van Gansbaai Academia Skoolbeheerliggaam. “Moet dus nie die gulde geleentheid vir goeie pryse misloop nie, kom skryf nou in om deel te neem.” Ernst sê alle lede van die publiek is ook welkom om ‘n ontbyt vanaf 08:30 tot 11:00 in die ontspanningssaal van Gansbaai Gholfklub te kom nuttig.

“Die ontbyt is uitstekende waarde teen slegs R35 per persoon en sluit 2 eiers, spek, varkworsie, beeswors en 2 snye roosterbrood in,” sê hy. “Voorts sal diegene wat die ontbyt ondersteun, outomaties in aanmerking kom vir ‘n geskenkbewys ter waarde van ongeveer R500 vir 'n ‘vol valet’ karwas by die donateur Carwash@gansbaai.”

Om teleurstelling te voorkom, kan ontbytkaartjies vooraf by Gansbaai Academia gekoop word, of skakel die skoolkantoor by 028-384-2370 of vir Helene Segal by 082-894-1651.