Tussen die ou jaar en die nuwe jaar leef herinneringe en wonders. Ons onthou die jaar se gebeure wat ons lewens gevul het  met oomblikke van vreugde, blydskap, ekstase en betekenis. Jy onthou die geboorte en doop van jou kind/kleinkind. Jy onthou die wonderlike gesinsvakansies. Jy onthou die kuiers saam met goeie vriende. Jy onthou die oomblik van versoening en vergifnis, van stukkende verhoudings wat heel geword het. Jy vind nou nog vreugde in die verhale waar geregtigheid geskied het. Waar liefde geseëvier het. Ons onthou gebeure wat ons lewens gevul het met hartseer, verdriet, pyn, bekommernis en diepe verlange. Ons onthou ons geliefdes vir wie die uurglas leeggeloop het. Jy onthou hoe vervreemding kom staan het tussen jou en jou huweliksmaat. Die vernedering van afdanking vul jou nou nog met woede en seer. Die verhuising van jou kinders na die vreemde het verlange jou metgesel gemaak.

Ons wonder ook. Ons wonder wat die dag van more alles sal inhou. Wat hou die nuwe jaar vir ons en ons geliefdes in? Sal alles maar weer vasgevang wees in die ritme van herhaling? Ons wonder of die komende jaar ook so haastig gaan wees soos die vorige. Ons wonder of ons die komende jaar ons kinders en kleinkinders meer gaan sien. Ons wonder of die ekonomie en politiek beter gaan vaar in die komende jaar. Ons wonder of ons die komende jaar beter sal var in liefhê, in die gee van geduld, vergifnis en omgee.

Tussen gister en more vind ons oriëntasie. In Latyn beteken die woord oriëntasie om jou te rig na die ooste, na die opkomende son. Vir die Latynse Christendom het dit beteken om na Jerusalem te kyk, na die tyd en plek van die Jesus-gebeure. Vir hierdie Christene is Jesus self die opkomende son van God se geregtigheid. In die Lig van hierdie Jesus het hierdie gelowiges ontdek wie hulle is en waarheen hulle op pad is.

Tussen die ou en nuwe jaar oriënteer gelowiges hulleself deur hulle geloofsoë op Christus te vestig (Hebr 12:2). Dan ontdek ons die Lig van Christus wat oor ons verlede en oor ons wonders oor môre val. In die Lig van Christus ontvang ons geloof, hoop en liefde.