TEKS:  1 Kor 15:21-28(vers 28)

Wat is die doel van die Evangelie?  Waarom word die evangelie van Jesus Christus, oor geslagte heen, verkondig?  Van kansels af, by Bybelstudies, deur ouers, oupa’s en ouma’s, in dagboeke, ens  word die boodskap verkondig van Jesus Christus wat mens geword het, gely het, kruisig is, gesterf het en uit die dood opgestaan het. Waarom word die boodskap verkondig. Wat is die doel van hierdie evangelie wat oor eeue heen verkondig word?

Verskeie antwoorde is al op die vraag gegee.  So het die Reformasie gemeen die kern van die evangelie lê opgesluit in die boodskap van die mens  wat grondig sondig is. Ons word verlos uit genade alleen, uit geloof alleen, deur die aanhoor van die Woord alleen.  In die tyd van die Verligting ontdek die mens sy verstand. Die tyd van die rede het aangebreek. Die mens kan self dink wat is waar, geloofwaardig en wat nie.  Die mens kan self besluit met gesonde verstand wat in die Bybel  is waar en wat is nie waar nie, wat is die doel van die evangelie en wat nie.  Na die tyd van die verligting sou daar vele antwoorde volg op die vraag na die doel van die evangelie.

Sommige meen dit gaan om versoening, ander meen  dit gaan eerder om bevryding.  Die Evangelie gaan om die bevryding van onreg en onderdrukking.(armes,randfigure,ens) .  Baie  meen die doel van die  evangelie het te doen met vrede. Veral in tyd van geweld en onvrede, word hierdie doel van evangelie al duideliker.  Ander meen weer dit gaan om die saak van verandering. Die verandering word met woorde beskryf soos  bekering en wedergeboorte.

Maar is dit alles die doel van die evangelie? Is dit waarom Jesus mens geword het? Sodat die mens verlos kan word, versoen kan word, bevry kan word? Paulus antwoord die vraag met ‘n paar woorde in vers 28: . . . ”So sal God alles wees vir alles”. Die  OAV lees “ sodat God  alles in almal kan wees”.   Die doel van die evangelie het in die eerste plek met God te doen. Met die Heilige Eer van God.  Jesus Christus word mens, ly, sterf aan die kruis, staan op uit die dood, nie sodat die mens (in eerste plek) verlos kan word, sodat ek kan hemel toe gaan, sodat ek voorspoed kan beleef,sodat ek altyd gesond kan wees,  maar sodat God alles in almal kan wees. Selfs Christus onderwerp Hom aan die Vader(vers 28) sodat God alles in almal kan wees.

Paulus kan om hierdie rede skryf in Gal 2:20 ” ek leef nie meer nie,maar Christus leef in my”. Handl 17:28: . . . “want deur Hom lewe ons, beweeg ons en bestaan ons”.

Is die sake van versoening, vrede, verlossing, verandering, bevryding, geregtigheid, ens dan nie belangrik nie? F Deist het dit mooi verduidelik toe hy gesê het, as ons die doel van die evangelie verstaan, kan ons die weg van die evangelie verstaan.  Die weg na die doel loop langs versoening, vrede, verandering, eregtigheid, ens.  Die weg wat Christus vir ons kom wys het. Die Christus  wat in Joh  14 sê  “Ek is die weg  die waarheid en die lewe.”