Norman Sauls, hoofouderling van die VG Kerk, het enkele hoogtepunte  van die afgelope jaar met ons gedeel.

♦ Gesamentlike Nagmaalsdienste is op 30 Junie 2013 in die VG kerk, Blompark, en op 29 September 2013 in die NG kerk gehou. Beide kerke was goed verteenwoordig. Beide kerke se diakens was deel van die reëlings gedurende die dienste. By dié pragtige geleenthede het beide kerke se kore ook opgetree.

♦ Hierdie jaar het Baardskeerdersbos as preekpunt bygekom. Die VG gemeente daar word op die eerste en derde Sondag van die maand met Woord en sang bedien. Hierdie is ‘n gesamentlike inisiatief  van die sending– en uitreikgroep en die kerkraad van Baardskeerdersbos. Die gemeenskapsaal van Baard-skeerdersbos word vir hierdie doel aangewend.

♦ Gedurende November 2013 sal nuwe lidmate in Blompark, Pearly Beach en Stanford bevestig word. Ons bid hierdie nuwelidmate seën toe met dié groot gebeurtenis in elkeen se lewe.

♦  Onder leiding van Nita Faber gaan die VGK koor van krag tot krag. Met hulle optrede gee hul uiting aan hul geloof en prys die Heer met lof- en dankliedere. Op 24 November  tree hulle tydens die NG Kerk se Kerssangdiens op. Die koor het ook deelgeneem aan die jaarlikse ringskorefees wat in Klein-mond aangebied is.Ouderling Norman Sauls wens namens die VGK die gemeentes en alle lidmate en kinders sterkte toe en bid dat dit vir almal ‘n baie geseënde feesgety sal wees saam met hul geliefdes.

Hy bevestig weereens dat in Christus elkeen van ons meer as oorwinnaars is.