Saterdagoggend 10 Augustus 2013 het die NGKerk Gansbaai se Vrouediens fees gevier met Elsabé Aldrich. Dit was ‘n oggend vol kleur(uitrustings en dekor) en geur(ete en drinke), diep gedagtes, en skaterlag wat die maagspiere geprikkel het.

Elsabé is ‘n uitstekende pretprater wat weet (en dit geniet) om haar gehoor te boei.
Haar dramatalent en verkwiklike humor help om diep waarhede met plesierigheid oor te dra. Sy glo dat blymoedige mense se lewe ’n fees is.

Haar tema vir die oggend was : Geheime van Vrouesappigheid
Enkele punte wat sy aangeraak het is die volgende:

Hoe is ‘n sappige vrou?
’n Sappige vrou is baie soos die vetplant van Afrika  - met die klem op plant en nie op vet nie.
Sy het dalk ’n eienaardige vorm, maar sy het die vermoë om te triomfantelik te bly – selfs in droogte toestande.
Haar wortelstelsel is puik en sorg dat sy nie papgeklap en uitgedor raak nie.

’n Sappige vrou het passie, en nie net van dáárdie soort nie.
Sy is positief oor die lewe.
Sy het ’n oorvloedmentaliteit, maar darem nie tot op die punt waar sy haar man met ’n ander vrou wil deel nie.

Sy floreer op klomplimente, maar is nie ongesond afhanklik daarvan nie.
Sy vóél reeds waardevol, want sy is.
Sy aanvaar haarself en maak vrede met die feit dat perfeksie nie op aarde haalbaar is nie.
Sy is onbeskaamd versot op haar mense.
Sy hou van verrassings en pak nuwe dinge aan.
Kort om, sy is bruisend vrou met geite en al.

Elsabé deel ook met die gehoor geheime van vroue –
sappigheid soos lag,
woema,
gesonde oë en
StaSoft-woorde.

Die gesellige oggend is deur die Vrouediens kommissie gereël. Verskeie gasvrouens was vir die versiering van en verversings op die tafels verantwoordelik. Dankie al hulle vir hulle moeite. Dit was pragtig!

Die verigtinge is deur Marina van Dyk geopen. Elcine Hulme het as “seremoniemeester” opgetree. Franzil Kotze het die bedankings gedoen.
Tydens die geleentheid het Sylvia Aggenbach se jeug dansgroepie ook opgetree. Hulle het die lied “Houtkruis” gesing.

Voorwaar 'n oggend om te onthou!!