Hierdie is ons laaste uitgawe vir die jaar 2013. Kersfees en Nuwe Jaar lê voor. Ons kyk met dankbaarheid terug op nog ’n jaar van God se troue liefde. Ons dank God vir die voorreg van gemeente-wees en vir sy seën vir ons.

Deel van God seën vir ons – oor baie jare – is ons vrouelidmate. Susters in die Here wat met sagte harte God se werk doen. Vroue, moeders, wat iets verstaan van die liefde van God wat in barmhartigheid en genade registreer.

In hierdie uitgawe van Seestrome kyk ons ook terug oor die jare van die vrouediens in ons gemeente. Ons blaai deur die boeke van ons herinneringe. Ons onthou en ons sê dankie.

Die redaksie wil ook aan elke lidmaat ’n geseënde Kerstyd toebid. Kerstyd is die tyd van welwillendheid. Mag ons in dié tyd ryke seën ontvang deur liefde te betoon aan ander.
Vir ons vakansielidmate wat weer by ons kom kuier in hierdie tyd - hartlik welkom. Mag julle in ons midde iets beleef van die vreugde en die vrede wat God in Christus gee. Soli deo Gloria