Die lede van die vrouediens: Die NG gemeente se vroue van De Kelders tot verby Pearly Beach en Baardskeerdersbos is tot vandag toe nog ‘n groep vroue wat diep spore in die gemeente trap.

Geskiedenis van die vrouediens: Ons het probeer om in die geskiedenis van die vrouediens (destyds die Vroue-Sendingbond) te delf, maar daar is soveel “ons onthou”- verhale dat hierdie ruimte net eenvoudig nie voldoende is nie. Ons wil dus graag in die volgende uitgawe hieraan dekking gee. Dames wat vir ons inligting het, moet ons asseblief kontak.

Die Vrouediens vandag: In 2013 word die vrouediens steeds as ‘n kommissie met bedieninge bedryf. Gansbaai vrouediens is ook steeds deel van die Caledon-ring en is op sinodale vlak ingeskakel by die Wes- en Suidkaap Vrouediens en betaal ook jaarliks sinodale bydraes.
Die bestuur van die vrouediens word jaarliks tydens ‘n algemene vrouediensbyeenkoms verkies en hierdie bestuur word deur die vroue in die streke en wyke ondersteun. Vir 2013 is Elcine Hulme voorsitter, Marina van Dyk, ondervoorsitter en Elize Eygelaar is sekretaresse. 

Waarvoor werk die Vrouediens: Die Vrouediens beplan elke jaar die program en projekte (op Sinodale en plaaslike vlak) waarvoor ons vroue hul beywer. Datums en inligting word deur die jaar op die kerkalmanak en die Sondagbulletin of met inligtingsblaaie na vrouelidmate deurgegee.

Algemene byeenkomste en fondsinsamelings: Vrouelidmate kom gereeld byeen en lewer onmisbare dienste deur middel van verskeie aksies en fondsinsamelings, die bediening van tee by begrafnisse, ondersteuning aan die dogters van Huis E van die Herberg-kinderhuis, Robertson en die koshuis Okkie Smuts in Stanford, en nog ander.